மகளுக்காக பாலிவுட்டில் வாய்ப்புதேடும் மாஜி நாயகி ராதா

Monday, June 06, 2011

மலையாளம், தமிழ் என்று ஏற்கனவே தனது மகள் கார்த்திகாவை நடிக்க வைத்து அழகு பார்த்த மாஜி நாயகி ராதா, இப்போது பாலிவுட்டிலும் நடிக்க வைக்க தீவிர முயற்சி செய்து வருகிறார். தமிழில் "கோ" படத்தின் மூலம் அறிமுகமானவர் கார்த்திகா. சமீபத்தில் வெளியான இப்படம் சக்கபோடு போட்டு, வசூலிலும் சாதனை படைத்து கொண்டிருக்கிறது. கூடவே தெலுங்கில் டப் செய்யப்பட்டு அங்கு சூப்பராக ஓடிக் கொண்டு இருக்கிறது. 

இதனிடையே இப்படத்தை பார்த்த பாலிவுட் நடிகர் அக்ஷய் குமார், இந்தியிலும் எடுக்க திட்டமிட்டு இருக்கிறார். 

இந்நிலையில் தமிழில் "கோ" படத்தின் மூலம் தனது மகளை அறிமுகப்படுத்திய ராதா, இப்போது இந்தியிலும் உருவாகும் "கோ" படத்திலும் நடிக்க வைக்க திட்டமிட்டு வருகிறார். இதற்காக "கோ" படத்தில் நடிக்கும் அக்ஷய்குமாரை சந்தித்து தனது மகளின் அருமை, பெருமைகளையும் கூறி சிபாரிசு கோரி வருகிறாராம். கூடவே தன்னுடைய மகளின் போட்டோக்களையும் இந்தி பீல்டில் உலவ விட்டு, அங்குள்ள பிரபலங்கள் பலரிடம் வாய்ப்பு கேட்டு வருகிறாராம்.